從小到大居住在大埔區嘅Heidi自小與大自然為伴，但係佢同老公栗子以前並唔熱衷於參與戶外活動。不過自從現年三歲嘅囡囡Mila出世，Heidi同栗子嘅生活漸漸出現變化，特別係認識Montessori教育理念之後，佢哋明白到大自然就係小朋友最好嘅學習地方，自此經常參與不同戶外活動，露營、野餐、划獨木舟 …… 一有機會就俾Mila親親大自然。點解Mila咁鍾意go out？聽吓佢代言人Heidi媽媽點講。
大自然係最好嘅學習環境
筆者數年前已開始追看甜點師Heidi的社交平台，看到各式令人垂涎的甜點，總是忍不住瘋狂俾like。自從女兒Mila出生，Heidi暫時放下甜點師的身分全力照顧家庭，但我仍會keep住追看Heidi的社交平台，因其IG上載了很多Mila的快樂成長片段，爽朗豪邁的小小女漢子Mila與大自然互動的愉快畫面更是令人難忘，睇見都想親親大自然。
Heidi：「Mila N班之前返咗個Montessori嘅parenting class，Montessori教育好著重小朋友0-6歲發展，特別 0-3歲係absorbent mind，腦部發展得最快，而大自然就係俾佢學習嘅最好最好環境。小朋友好似嚿海棉咁，身邊環境擺啲咩俾佢佢就直接吸收。當佢見到啲葉飛落嚟，佢唔知道點解，但係突然之間有日佢覺得有風，見到啲樹飛咗塊葉落嚟就會link到啲嘢，係佢自己發現唔係你話俾佢知呢度有風吹咗塊飛葉落嚟， 佢哋會自己探索多啲。」
Mila最愛赤腳感受大自然
Heidi與丈夫栗子先到沙灘整頓好，再到學校接Mila放學來個午後野餐。Mila見到沙灉上滿桌精緻食物，即興奮得脫下鞋子奔跑到食物前大快朵頤。Heidi︰「Mila好鍾意除鞋，好鍾意用腳去feel唔同感覺，佢好鍾意草地、都鍾意沙。小朋友喺大自然會用眼睛、鼻、味覺、皮膚去慢慢感受，佢自己會感覺到石同沙有咩分別，呢啲就係data慢慢入晒佢腦，到佢大個就會connect返啲嘢。」
野餐乾淨過去餐廳食飯
「我一路以為所有細路天生鍾意大自然，原來唔係㗎﹗可能當你0-3歲都無接觸過大自然環境，第一次接觸就會有啲抗拒。好多大人會同小朋友講泥土污糟，小朋友就會真係會入咗腦以為泥土係污糟，但係其實泥土係乾淨。我哋好鍾意野餐，通常會準備啲生果、 nuts、pretzel、蛋糕、如果當埋午餐就會食pasta。大自然環境其實好乾淨，可能仲乾淨過你喺餐廳食，餐廳嘅檯、嗰塊隔離膠板，掂完又要消毒，仲污糟啦﹗」Heidi強調。
小朋友喺戶外識自己搵嘢玩
自從生咗Mila，Heidi同栗子兩公婆都好享受參與戶外活動，偶爾亦會約埋其他家庭一齊go out，除咗因為想小朋友親近大自然，最重要係成班大人都好enjoy。Heidi︰「我鍾意camping㗎﹗ 細路有細路玩、大人有大人chill。Mila兩歲半嗰陣第一次去camping，當時都擔心佢瞓唔到，點知一去到已經完全唔使理佢，唔使entertain 佢，佢自己執樹枝、打啲水，周圍都搵到嘢玩，完全唔使諗嘢俾佢玩。嗰次佢係超開心，跟住佢返屋企沖涼盆水係灰色㗎﹗好恐怖﹗」
室外同室內都用到嘅裝備
去過camping又去過glamping嘅Heidi話享受前者多於後者，因為去glamping往往會掛住打卡影靚相搞到唔夠relax。不過向來鍾意影相嘅佢點都會影少少相留念，打得卡就點都會關注裝備嘅外表，實用至上都唔可以唔靚，Heidi慶幸好多戶外裝備喺屋企都用到，絕對唔浪費。「好多gear係戶外同室內都用到，譬如呢啲camping櫈，我哋長時間都會放喺屋企平時都會坐，又靚又方便。去野餐、露營我都會帶FALCON 搪瓷碗碟、因為都算輕而且唔易跌爛，小朋友用都唔怕跌爛，喺屋企又用得返﹗」
Guests / Heidi, 栗子, Mila
Text / Phoebe Chan
Art Director / Kenneth Chan
Photographer / Marie Anson
Design / Kiki Wong
--------------------------------------------------------------
追蹤《GO OUT Hong Kong》
Instagram / goout_hongkong
Facebook / GoOutHongKong
YouTube / GO OUT Hong Kong
Online store / goout.com.hk