喺好多人心目中，「山中遊子」及HAKDIM (黑店) 創辦人AM，唔止係行山專家，亦係露營達人，點會諗到原來佢曾經好憎去露營。唔止咁，你以為「黑歷史」滿滿嘅AM眼中就只有「黑魂美學」？原來黑色以外，白色都係AM心目中露營美學嘅關鍵字。
AM
- HAKDIM（黑店）創辦人
- 戶外單位「山中遊子」創辦人
- 任職攝影師及登山領隊
- 曾到不同國家登山，走遍香港逾300座山
最鍾意嘅戶外活動係行山
近年愈來愈多香港人熱衷於行山，有人為了遠離市區呼吸新鮮空氣、有人為了慰藉未能到異地旅行的心癮，也有人只是為了拍好看的照片放上社交平台 …… 兩個喜歡攝影的男生，多年前因為到山野裡找題材而開始行山，過程中愛上了行山，其後更以「山中遊子」的名義推廣本地行山文化，其中一位就是AM。「我最鍾意嘅戶外活動一定係行山﹗第一次行大刀屻，唔記得係09年定係10年。同friend行山第一次就係去東壩，風景好靚，嗰陣時無諗過香港會有啲咁嘅地方。」行吓行吓，不經不覺AM走遍香港逾300座山，疫情前佢亦去過不同國家登山，「我去過台灣嘅百岳、玉山、嘉明湖嘅三叉山、向陽山、雪山，日本富士山、屋久島嘅宮之浦岳、越南嘅番西邦峰、韓國嘅漢拿山、尼泊爾嘅Island Peak、俄羅斯Elbrus、非洲kilimanjaro、法國Mont Blanc……」再數落去應該天黑都未數完。
因為愛行山所以享受露營
這些年來，熱愛行山的AM穿梭於山野之間，原來正是因為攀山越嶺途中需要休息，才培養出對露營的興趣。「某程度上，露營對我嘅意義就係休息，因為我鍾意行山，如果我要行好長途嘅山，一日係行唔哂，咁我就需要喺山上露營休息，先可以繼續行落去。起初唔習慣露營會眼光光成晚瞓唔到，到後來習慣咗野外休息，而家去露營好好瞓，直情好瞓過喺屋企，因為屋企會有好多嘢令你分心，做嘢呀電腦呀睇戲呀打機呀，去露營先至真係休息。」
帳篷／HAKDIM x Pre Tents Soloist 1p 3 Seasons tent
細個曾經好憎camping
喺好多人心目中，AM唔止係行山專家，亦係露營達人，點會諗到原來佢曾經好憎去露營。AM︰「好細個我阿爸就帶我去露營，因為佢係童軍，好鍾意呢啲戶外活動。但係我細個嗰陣就覺得去露營好辛苦，夏天又熱、冬天又凍，點及留喺屋企打機睇電視咁舒服，做咩無端端要捉我哋去荒山野嶺露營？同埋去露營要帶好多嘢，嗰陣唔似得而家有咁多輕量裝備，要拎好多好重嘅嘢去露營，所以嗰陣時係好唔鍾意、好憎去camping。 」咁因咩事會由恨變愛呢？「直到13年去完富士山，嗰陣識咗一班friend，佢哋就係俗稱 『Gear撚』，佢哋真係識好多gear嘅嘢，當時我係完全唔識嘅，於是畀佢哋荼毒咗， 發現行山露營都可以好輕，同埋唔係好似以前咁老套，都有好多靚嘢。」
睡袋 ／Muraco thermal sleeping bag protector
枕頭 ／Sea to Summit Aeros ultralight pillow
坐墊／wechsel facila
行山杖／Black Diamond Carbon Z pole
喺大自然當中點呈現自己
認識咗一班俗稱 『Gear撚』嘅朋友之後，AM開始對戶外活動有新嘅睇法。「露營美學可以反映一個人嘅風格，反映佢想喺大自然入面點樣呈現自己。我嘅露營風格就係Less is more，夠用就得。我係一個好懶嘅人，以前唔鍾意露營就係因為我懶，懶得拎咁多嘢。早幾年麥徑全走嗰時帶咗好多無謂嘢，孭住啲無謂嘢孭足一百公里，返嚟同啲Friend講個個都笑我，自此之後一嘢cut哂啲無謂嘢，而家我會帶輕量嘅裝備，盡量帶少啲嘢。每次買親gear都會即刻磅，有時會list哂所有嘢嘅重量出嚟，咁就可以虛擬執袋。」
水袋／Hydrapak 2L Seeker
濾芯／Hydrapak Befree filter tactical
食器／snow peak trek 700
爐頭 ／Soto WindMaster Stoveoto
筷子／Living Plaza
膠鎚 ／HAKDIM x Elephat Black Camping Hammer
營燈／Goal Zero Flash、Ledlenser ML4
背囊 ／Atom Packs EP30 Custom
非黑即白美學簡單係最靚
2018年，AM開設只售賣黑色戶外用品的專門店，直截了當以 HAKDIM （黒店）命名，迅即吸引一眾酷愛黑色造型的支持者追捧。還以為AM只鍾意於黑魂美學，原來在迷上黑色以前，他曾經熱愛白色，到後來漸漸變黑，再到現在忠於黑為主白為輔的美學理念。「其實我以前係全白色㗎﹐個營都係白色﹐但係去到2016、7年左右，就開始想搵隻黑色營，咁啱真係搵到隻自由之魂嘅黑營，嗰時就諗點解黑色露營gear咁難搵，跟住就開始專搵黑色gear，其實都有嘅，不過可能因為比較小眾，香港店舖未必會入返嚟，要自己喺外國搵，搵吓搵吓慢慢就全部嘢變哂黑色﹗（笑）後來又覺得﹐其實黑色當中夾雜少少白色同樣簡單得嚟好靚，有時唔帶蛋墊（睡墊）就瞓呢張白色bivvy，全部嘢都係黑色但有一條白色嘅嘢好sharp，簡簡單單都有型。」
Text / Phoebe Chan
Art Director / Kenneth Chan
Assistant / Bonita
Photographer / Marie Anson
Design / KiKi Wong
--------------------------------------------------------------
追蹤《GO OUT Hong Kong》
Instagram / goout_hongkong
Facebook / GoOutHongKong
YouTube / GO OUT Hong Kong
Online store / goout.com.hk