《香港秘密搜查官》唔止為Asha帶來人氣，跟Mike導上山下海拍攝嘅經歷，令自小熱愛大自然嘅Asha更加肯定自己有團go out火。Asha︰「其實我對好多戶外活動都有興趣，只係無人陪我就無動力去做。拍完搜查官之後有種『why not？』嘅想法，而家都三字頭仲唔試等幾時？」同意，而家唔go out等幾時？
自小與自然環境為伴
有啲女仔抗拒親親大自然﹐可能係怕蚊叮蟲咬、或者嫌呢樣唔方便嗰樣好污糟。對自小家住近郊地方嘅Asha嚟講，大自然就好似屋企咁親切。Asha︰「其實我係一個好鍾意親親大自然嘅人，因為我由細到大住錦田，加上阿媽係菲律賓人，佢住離開城市好遠嘅地方，真係好山旮旯，所以我由細到大都習慣喺大自然環境下長大，喺戶外地方感覺好舒服，一種逃離現實世界嘅舒服。」
戶外活動是一場冒險
「以前我以為自己好摺埋好毒好鍾意留喺屋企，後來發現人愈大愈鍾意出去感受吓呢個世界。例如我好鍾意揸車去啲未去過嘅地方，又好鍾意行山。可能好多人覺得香港無乜地方冒險， 但係其實可能行行吓山盪失路都係一種好好玩嘅冒險。好似今日咁，拍攝行行吓轉個彎，嘩﹗原來個景點係咁正﹗戶外活動就係好玩在時刻都好似喺度冒險。」 Asha愈講愈興奮。
行山要行唔似路嘅路
以為Asha咁苗條一定好鍾意做運動？錯﹗運動嚟講佢只鍾情行山。Asha︰「細細個喺錦田住每逢weekend都要行山，有時跟阿媽返菲律賓，去隔離村就要行山，行山唔係消閒活動，想去目的地就要行山。我唔鍾意行平地嗰啲山，我覺得好無癮， 同埋好似行極行唔完，啲景又一樣。行山嚟講，我最鍾意啲唔似路嘅路，如果行兩個鐘我會覺得唔夠喉，起碼行三個鐘以上先覺得自己行咗山。」
拍搜查官行山搵結界
行慣山嘅Asha，會唔會覺得拍搜查官嗰陣上山下海無難度？「咁大個女行山最甘嗰次就係拍搜查官，連製作組都話係佢哋最深刻一次，行咗成11個鐘﹗因為我哋要搵個結界，天黑黑又危檢又怕黑又驚鬼，不過嗰十幾個鐘行得好開心，完咗先發現咁攰，我好proud of 可以成為其中一分子﹗」
而家唔go out等幾時
Asha話《香港秘密搜查官》呢個節目為佢帶來好多得著，特別係投入戶外活動嘅信心。「我好記得拍完去到最後尾，Mike導話好彩唔係搵我同Hanna拍美女郊遊遊，佢話估唔到我同Hanna都幾捱得。好開心啊﹗身為女仔可以證明俾班男人睇我哋都得，好滿足﹗其實我對好多戶外活動都有興趣，只係無人陪我就無動力去做。拍完搜查官之後有種『why not？』嘅想法，而家都三字頭仲唔試等幾時？所以我即刻去咗學潛水。」係㗎，機會錯過了未必會再來，而家唔go out等幾時？
Guest / Asha CuthbertText / Phoebe Chan
Art Director / Kenneth Chan
Photographer / Marie Anson
Assistant / Bloom
Wardrobe / WANDERS, NIKE
Make Up Artist / Judy Cheung @judymakeup
Hair Stylist / Chorus ko @MM Aveda
Design / KiKi Wong
Special thanks / Route 9 & Daisukgor
--------------------------------------------------------------
追蹤《GO OUT Hong Kong》
Instagram / goout_hongkong
Facebook / GoOutHongKong
YouTube / GO OUT Hong Kong
Online store / goout.com.hk