【露營美學 の 重要性 / 顏色配搭係樂趣，唔想影響大自然景觀。／Rita】

又一個因為疫情而入坑露營的例子。

旅遊平台MIDWAY.VOYAGE主理人Rita直言，以前可以靠旅行抒發日常生活嘅鬱悶，直至疫情來臨不再話飛就飛，愛行山卻有感喺香港行山來來去去都係咁……在熱愛露營的好友推波助瀾下，終於決定kick off一直想做嘅事 ── 去露營！結果如命中注定般一試愛上，身為選物店店主的她邊享受露營樂邊試用裝備，試過好用認定夠靚先至推介俾大家，真正寓工作於享樂﹗雖然自認露營新手卻滿口經驗之談，今回有請Rita分享佢嘅露營美學！

Rita

• 選物店SHOP 創辦人
• 旅遊平台VOYAGE作者
• 咖啡店PRESS THE BUTTON店主

帳篷 ／Six Moon Designs Haven Bundle Backpacking Tarp (Pan之物)

 藉露營抒發無得飛嘅鬱悶

旅遊平台MIDWAY.VOYAGE主理人Rita強調，自己唔算非常熱愛戶外活動嘅人，然而當疫情來臨不再話飛就飛……「有時會好想離開平時生活嘅環境，藉著旅行抒發日常生活嘅鬱悶，而家無得去旅行變咗要搵第二啲活動做。我鍾意去世界各地唔同地方行山，但係喺香港行山來來去去都係咁，所以決定kick off我哋一直都好想做嘅事，就係試吓camping。點知一試就鍾意咗，我enjoy camping，因為喺戶外瞓覺嘅感覺幾好，睡眠質素都好，除咗有時遇到啲人會播好大聲嘅歌或者好大聲傾偈，喺戶外瞓覺真係好靜﹐同埋無光害嘅地方真係好黑，太舒服。

買靚裝備係去露營嘅動力

曾幾何時，筆者堅持租借裝備，因怕入坑之後會買到不能自拔，原來當初Rita唔敢去camping，都係驚忍唔住瘋狂置裝。Rita：「之前唔係無諗過去露營㗎，只係諗起露營要添置更多嘅裝備器材就卻步﹐但到最後都忍唔住要開始啦﹗我覺得第一次應該要跟啲有經驗嘅人去，一來我哋無咁多裝備，二來重要嘢佢哋都有哂，我就純粹帶啲好personal嘅嘢、食物、同埋一啲輕裝嘅嘢，試咗第一次之後就知道自己需要買啲咩。去露營最大樂趣除咗join朋友一齊玩，另一樂趣就係試用gear，我同Pan（Rita先生）鍾意source一啲我哋覺得好嘅裝備，用過真係好就擺喺舖頭（MIDWAY.SHOP）賣。買靚裝備係去露營嘅動力，所以我會好留意啲日本露營網站，因為佢哋好多係開賣第一日就已經即刻賣哂，好緊張 ﹗」

功能、美感、顏色都重要

每個camper都有屬於自己嘅checklist，對Rita而言，最重要係帶埋老公︰「一定要帶阿Pan，因為佢會搵好多資料、睇吓邊度適合我哋去、而且知道我需要乜嘢，同埋我用緊嘅部分gear都係屬於佢嘅，例如今日呢個tent。」作為選物店店主，唔知Rita選擇露營裝備有咩要求。Rita︰「我覺得功能同埋外表兩樣嘢都重要﹐最好就係平衡到，我嘅preference係唔會揀一啲好colorful嘅嘢。幾年前成日行山嗰陣，即係Yamagirl（山系女孩）好興嗰個年代，女仔鍾意好colorful嘅顏色，所以我以前用嘅背囊、著嘅衫全部都係好Colourful，到我第一次去camp嘅時候拎返出嚟用就覺得好似out咗喎，所以就開始搵囉﹗同埋近年係興返啲Earth tone或者低調啲嘅顏色。」

「雖然我好鍾意黑色，但係又未去到要買晒全部黑色，因為我覺得match顏色做配搭都係樂趣。我嘅露營裝備以素色為主，其實我哋一齊去camp嘅朋友大家都係好Earth tone，或者顏色比較subtle啲，咁樣影相出嚟效果都會靚啲，同埋唔會影響到大自然個景觀﹗如果你拎啲好肉酸嘅顏色出嚟會被人笑㗎（笑）﹗不過有啲我認為需要即刻搵到嘅嘢，我就會用sharp啲顏色嘅袋去裝住，或者First Aid嘅嘢我都會用紅色袋裝住，其他所有gear就會係素色為主。」

小碗／TSUBAME 黃銅露營杯 (MIDWAY)
杯子／TSUBAME 可堆疊不銹綱杯連水松杯套 (MIDWAY)
餐具／GLOCAL STANDARD PRODUCTS不銹鋼戶外餐具 (MIDWAY)
咖啡／BUNDY BEANS LOCAL SELECTION (PRESS THE BUTTON)
蚊香／DAILY INCENSE３小時螺旋蚊香 (MIDWAY)

「我嘅架步其實好簡單，因為去camping最緊要係食嘢同埋傾偈，仲有咖啡，我每日一定要飲咖啡，不過我哋通常會帶drip bag，細細包已經可以解決咗我對咖啡嘅需要。呢個係可以套返隔熱墊嘅杯，飲熱嘢嘅時候唔會熨到手，仲有一個簡單嘅燒多士架，呢個已經係買第二個，第一個已經燒到好肉酸爛哂。除咗燒麵包，我哋仲會用嚟擺串燒喺上面燒，佢可以摺埋，收埋一細塊咁幾好。必帶嘅仲有基本嘅煮食工具，用來煲吓水，除咗多士架，呢啲全部都可以喺我哋鋪頭買到。」

女仔去露營的確特別麻煩

好多人話女仔去露營有好多心理關口要過，Rita又點睇？「係，女仔係特別麻煩嘅！（笑）例如好多時去camp會搽防曬，但係喺戶外又未必方便洗面，所以落妝嘅濕紙巾，例如呢個喺MUJI買嘅Cleansing Wipes係一定要有，仲有呢個MIDWAY有得賣嘅MISOKA 免牙膏礦物塗層旅行牙刷，蚊怕水啦﹗我都係好惹蚊，呢枝係用檜木造base嘅天然蚊怕水﹐細路仔都用得。另外呢個就係LUSH嘅洗頭粉，因為個頭𥹉嘅感覺真係好唔好，尤其是香港喺潮濕嘅天氣去露營，個頭點都係好似黐住咁，將洗頭粉倒少少喺個頭到﹐等個頭乾爽返。如果天冷就要帶定保暖物品（見後頁），仲有就係帽，日頭太曬喇，用來擋吓風遮吓太陽，同埋遮住個𥹉頭。有時我會帶兩頂，一頂就係日頭有太陽用，收太陽夜晚開始凍我就會戴另一頂帽。」

冷帽／COS raw cut wool hat  
腹卷／日本版Columbia Omni-heat 腹卷
冷襪／YAECA pile wool socks  
小物袋／MUJIParaglider Cloth Drawstring Bag - Orange  

願去北歐露營睇日落日出

疫情逐漸放緩，出走旅行似乎指日可待，假如機會來了，你會想試吓點樣嘅露營體驗？Rita：「如果喺香港練習咗而我哋嘅裝備又OK嘅話，咁就可能會試下去外地露營。我諗Dream camping會係去北歐囉，曾經睇過有條YouTube片，唔記得係行一個月定一個禮拜，有啲spot係有好靚嘅避難小屋，有啲中途比較遙遠啲嘅就要自己紮營，沿途嘅風景好靚，北歐嗰個好夢幻嘅日落或者日出，如果去camping望到會好開心 。」

--------------------------------------------------------------

追蹤《GO OUT Hong Kong》

Instagram / goout_hongkong
Facebook / GoOutHongKong
YouTube / GO OUT Hong Kong
Online store / goout.com.hk